لغه الجسد في الكلاب
الموضوع مجرب وعن خبره ومش منقول من اي حته وممكن يكون ناقص حاجات طبعا
طبعا الكلاب من الحيوانات اللي بتعبر عن طريق حاجتين "نبره الصوت-وحركات الجسد"
مبدأيا الموضوع مطبق علي الجراوي والكلاب الكبيره لكن الجرو بيكون لسه بيستكشف بمعني انه بيجرب مع صاحبه اكتر من اسلوب لحد لما يوصل للي هو عايزه ..
الجرو بيكون بيعض كتير ده لعب مش هجوم
الجرو لحد سنه 5 شهور بيكون صعب يسيطر علي نفسه ف انه يتحدد ليه مكان يعمل فيه حمام وده طبيعي
الجرو بيكون شخصيته ف فتره من شهرين لحد 7 شهور يفضل يتم التعامل معاه بناء علي اللي انت محتاجه ليه سواء شوهات او حراسه او شراسه او طاعه او غيره تقوي شخصيته علشان يستقبل التدريب فيما بعد ..
اولا نبره الصوت غالبا بتبقي لكل كلب لوحده مش عامه ف كل
الكلاب لانه بيجرب كتير لحد لما يلاقي رد فعل من صاحبه مناسب
من النبرات انه يصرخ بصوت رفيع ف وسطها هوهوه بيبقي الكلب عايز يخرج من مكانه
الصريخ المبالغ فيه بصوت عالي بيكون الكلب بيتألم
الهوهوه بصوت عالي مع عدم الجري والثبات ف المكان بيكون عايز يلفت نظر صاحبه علي حاجه
الهوهوه بصوت عالي مع الزوم بيبقي دليل علي الهجوم او الرغبه ف العنف او اللعب لو لصاحبه
هنتكلم بقي عن كتير من لغات الجسد ف الكلاب
طبعا الكلب اكبر جزئين بيعبر بيهم هما تعبيرات عينه و حركات ذيله
في كلاب معينه هي الكلاب العصبيه اوي لما بتتعصب او تشوف قطه او كلب او حد غريب بيقف شعر ضهرها كله وينتصب وبيختلف من كلب لتاني حسب درجه عصبيته ده مفيهوش مشكله ده طبع ف الكلب العصبي وبيبقي تعبير عن رفضه الكائن اللي بيهاجمه ده تماما
تعبيرات العين بتبقي كالاتي
ف حالات الاثاره سواء فرحه او وجود كلب تاني او وجود شخص غريب الكلب بيبقي ف وضع انتباه و عينه موجهه ومركز جدا
ف حاله الحاله النفسيه السيئه بيبقي العينين مكسورين والكلب كسلان وباصص ف الارض وبيرفع عينه ويبص لصاحبه وهو قاعد ف مكانه
الذيل هو اكبر اداه بتعبر عن حاله الكلب علشان كده ف حالات كتير ناس بتقص ذيل الكلاب علشان محدش يعرف الكلب بيفكر ف ايه او حالته ايه لو في حرامي او حد غريب او ف حالات الفايت...
من
الحاجات المشهوره عن الذيل هز الذيل ف اتجاهين افقي مع وضع الجسم بيبقي تعبير عن الفرحه
وفي حاله زياده الفرحه بيبقي هز الذيل مع هز النصف الخلفي من الجسم وده بيظهر ف حالات كتير اول لما الكلب يشوف صاحبه
وقوف الذيل في وضع رأسي علي الجسم بيبقي تعبير عن استعداد لحركه مفاجئه وبيبقي معاه شد الجسم و الرقبه والصدر والاذن حتي ف الانواع اللي ودانها نايمه بيبقي شادد عصب الاذن
وقوف الذيل مع شد الرقبه وتركيز العين بيبقي استعداد للهجوم ف حالات كتير
خروج طرف اللسان من الفم وهو قافل الفم بيبقي تعبير عن الحب ودي عن تجربه لو قعدت تتكلم مع كلبك هيطلع طرف لسانه وهو بيبصلك كأنه بيقولك "انا بحبك"
لما الكلب بيديك ضهره ويلف ويديلك ضهره كتير ده مش تعبير عن التجاهل ده تعبيرعن السلام لان سلاح الكلب فمه وهو بيبعده عنك ف كأنه بيقولك انا معنديش اي استعداد للهجوم دلوقتي
لما الكلب بيكسر ودانه او عصب ودانه بيبقي تعبير عن الاحترام بشكل كبير
لما الكلب بيكسر ودانه بجانب نزول الرجلين اللي قدام علي الارض او القعده علي الارض بشكل كامل بيبقي تعبير عن الخضوع او الخوف
لما الكلب يكون نظيف بشكل كبير من الحشرات وبيقعد يهرش وهو باصصلك بيبقي الكلب محطوط تحت ضغط ومش عايز يركز معاك
لما الكلب بيحط ذيله بين رجليه بيبقي ف وضع خوف شديد و فحالات كبيره بيعمل حمام علي نفسه من الخوف
في حاله الغضب او الهجوم بيبقي هوهوه مع الهجوم علي الشخص بدون تراجع
في حاله انه بيهوهو ويجري علي الشخص ويرجع بيبقي تحذير بعدم التقدم من الشخص
لما بينام علي ضهره ويرتاح خالص بيبقي تعبير عن الراحه النفسيه الكبيره
باختصار لو انت مربي جديد و اخدت بالك من ردود فعل الكلب اللي مكتوبه وقربت لكلبك و اتكلمت معاه وحبيته واكلته من ايدك
هتاخد كلب متزن نفسيا و دي اهم حاجه علشان يستقبل التدريبات فيما بعد
الموضوع كتابه شخصيه للادمن Ahmed Tawfik Ahmed ومش موجود ف اي صفحه تانيه علي الفيس ولا اي موقع علي النت باسثناء المدونه بتاعه البيدج ...
ahmed tawfik
.jpg)
